21.08.2020
D'Thillenvogtei ass e Musée zu Randschelt, wou ee ka gesi wéi d'Leit fréier gelieft hunn. De Fritzi war fir d'Picknicksgeschichte mam Potty Lotty" do. Virdru war hien sech de Musée ukucken. Well et gereent hat, ass de Picknick an der Scheier ofgehale ginn. Et ass e super flotte Kader an immens gemittlech. Jiddereen huet säin eegene Picknick-Kuerf kritt mat regionale Produit'en (Bréitche mat verschiddenem Belag, Kuck am Glas, Drauwen, Wuppen a Viz). D'Potty Lotty huet d'Kanner an déi Erwuessen eng Stonn laang mat léiwen a witzege Geschichten ënnerhalen. Duerno haten déi Grouss an déi Kleng d'Méiglechkeet op der Wiss Spiller ewéi fréier ze spillen (Schleider, Douse schéissen, Keelen, ...). De Fritzi hat vill Freed an et war eng gelongen Ofwiesslung zu engem Alldag mat vill Technik.
