04.09.2020
Am September 2020 waren de Foxi an den Hopsi um Escher Gaalgebierg beim Maisy vum Kuelebierg op Besuch. D'Maisy war leider net do, mee hat huet deenen zwee säi Bamhaus fir eng Nuecht iwwerlooss. Déi 3 Bamhaiser sti matten am Déierepark a si fir 4-6 Leit geduecht. Et gëtt e Buedzëmmer, 2-3 Schlofzëmmer, en Iesszëmmer mat enger mini Kichen an 1-2 Terrassen. Dem Maisy säin Haus ass wonnerschéin dekoréiert, immens propper an d'Better hu bequem Matrassen. 2 Parkplazen (+/- 150 m ewech) pro Haus stinn och zur Verfügung a mat engem Badge kann een zu all Moment mam Auto eraus an era fueren. Gratis Déierefudder steet natierlech och prett. Moies hunn de Foxi an de Hopsi Kaffi op dem Maisy senger Terrasse gedronk. Bréidercher, Croissant'en a wat ee soss nach brauch, kritt een an engem Kuerf an d'Haus bruecht.
E Bamhaus fir eng Nuecht ass kee bëllege Spaass, mee de Präis ass absolut gerechtfäerdegt. Och de Bamhaus Café ass een eenzegaartegt Erliefnes.
De Foxi an den Hopsi ware sécher net fir d'Läscht an de Bamhaiser um Escher Gaalgebierg.
